ممبئی، 28 ستمبر — جموں و کشمیر کے چناب خطے سے تعلق رکھنے والے سابق کرکٹر متھن منہاس اتوار کو بھارتی کرکٹ کنٹرول بورڈ (بی سی سی آئی) کے صدر منتخب ہو گئے۔ سالانہ اجلاس میں ان کا انتخاب بلا مقابلہ عمل میں آیا۔
منہاس اس عہدے پر پہنچنے والے جموں و کشمیر کے پہلے کرکٹر ہیں۔ ان کے صدر منتخب ہونے سے قبل راجر بِنّی کی مدت مکمل ہوئی تھی جبکہ راجیو شکلا نے عبوری طور پر ذمہ داریاں سنبھالی تھیں۔
انتخابات میں دیگر عہدوں پر بھی تقرریاں عمل میں آئیں جن میں راجیو شکلا نائب صدر، دیواجیت سائیکیا سیکریٹری اور پرابھتیج سنگھ بھاٹیا جوائنٹ سیکریٹری منتخب ہوئے۔
متھن منہاس نے دہلی اور جموں و کشمیر کی نمائندگی کرتے ہوئے ڈومیسٹک کرکٹ میں نمایاں کارکردگی دکھائی۔ وہ دہلی کی جانب سے رنجی ٹرافی جیتنے والی ٹیم کے کپتان رہے اور آئی پی ایل میں دہلی ڈیئر ڈیولز، پونے واریئرز اور چینائی سپر کنگز کا حصہ رہے۔ ریٹائرمنٹ کے بعد انہوں نے کوچنگ اور کرکٹ ڈھانچے کی ترقی کے لیے بھی خدمات انجام دیں۔
بی سی سی آئی کے نئے صدر نے انتخاب کے بعد کہا کہ وہ بھارتی کرکٹ کی ترقی، جدت اور شفافیت پر توجہ دیں گے۔
