لیہہ؍؍چیف سیکریٹری آشیش کندرا نے لداخ میں سرکاری بھرتیوں، ترقیوں اور خالی آسامیوں کی مجموعی صورتحال کا جائزہ لینے کے لیے ایک اعلیٰ سطحی اجلاس کی صدارت کی اور متعلقہ محکموں کو فوری اقدامات کی ہدایات جاری کیں۔

اجلاس میں مختلف سرکاری محکموں میں جاری بھرتی کے عمل، یونین پبلک سروس کمیشن اور دیگر بھرتی اداروں کو آسامیاں بھیجنے کی رفتار اور ڈیپارٹمنٹل پروموشن کمیٹیز کی کارکردگی کا باریک بینی سے جائزہ لیا گیا۔ چیف سیکریٹری نے واضح کیا کہ ترقیوں میں تاخیر سے پیدا ہونے والا جمود ختم کیا جائے تاکہ نچلی سطح پر نئی آسامیاں خالی ہو سکیں اور بھرتی کا عمل آگے بڑھ سکے۔

انتظامی سیکریٹریز نے اجلاس میں اپنے اپنے محکموں میں جاری بھرتیوں، موجودہ خالی آسامیوں اور مستقبل کے بھرتی منصوبوں پر تفصیلی بریفنگ دی۔ گزٹڈ اور نان گزٹڈ دونوں سطحوں پر ترقیوں کی صورتحال اور عملے کی کمی کے مسئلے پر بھی سیر حاصل بحث کی گئی۔

لداخ سبارڈینیٹ سروسز سلیکشن بورڈ اور ریکروٹمنٹ بورڈ کے زیر اہتمام آئندہ امتحانات کی تیاریوں کا بھی جائزہ لیا گیا۔ حکام نے بتایا کہ متعدد آسامیوں کے لیے امتحانات 28 مارچ سے شروع ہو کر مئی تک جاری رہیں گے۔ امتحانی عمل میں شفافیت کو یقینی بنانے کے لیے دونوں اضلاع کے ڈپٹی کمشنرز کو نگران افسران کی باہمی تبدیلی کی ہدایت دی گئی۔

چیف سیکریٹری نے کہا کہ طویل عرصے سے خالی پڑی آسامیوں کو ترجیحی بنیادوں پر پر کیا جائے اور اس سلسلے میں دونوں اضلاع میں روزگار میلوں کا انعقاد کیا جائے۔ انہوں نے بھرتی کے قواعد کو یو جی سی کے رہنما اصولوں سے ہم آہنگ رکھنے کی بھی تاکید کی۔

کلچر اکیڈمی، شعبہ صحت اور اسکول ایجوکیشن میں افرادی قوت کی شدید کمی پر تشویش کا اظہار کیا گیا۔ جنرل ایڈمنسٹریشن ڈیپارٹمنٹ کو پابند کیا گیا کہ وہ تمام محکموں کے لیے یکساں اور معیاری ریکروٹمنٹ رولز مرتب کرے تاکہ بھرتی کا عمل آسان، شفاف اور یکساں بنیادوں پر استوار ہو سکے۔

اجلاس میں یہ بھی طے کیا گیا کہ تمام محکمے 15 دن کے اندر ایک مرکزی ڈیجیٹل ڈیٹا بیس تیار کریں جس میں خالی آسامیوں، ڈی پی سیز کے شیڈول اور موجودہ بھرتی صورتحال کی مکمل تفصیلات درج ہوں تاکہ نگرانی اور احتساب کا نظام مضبوط بنایا جا سکے۔

نئے اضلاع کے قیام کے تناظر میں چیف سیکریٹری نے تمام متعلقہ محکموں کو ہدایت دی کہ وہ تعلیم، صحت اور بنیادی ڈھانچے کے شعبوں میں درکار افرادی قوت کا پیشگی تخمینہ لگائیں تاکہ نئی انتظامی اکائیوں میں عوامی خدمات بلا تعطل جاری رہ سکیں۔ اجلاس میں سی جی ایچ ایس اور پنشن اسکیموں سے متعلق امور پر بھی غور کیا گیا اور سینئر افسران نے بھرپور شرکت کی۔