لیہ، 15 مئی: بدھ مت کے مقدس تبرکات کو جمعہ کے روز لیہ ایئرپورٹ پر انتہائی جذباتی انداز میں الوداع کہا گیا، جس کے ساتھ ہی لہ میں 14 روزہ نمائش کا اختتام پذیر ہو گیا۔ اس تاریخی موقع پر 1 لاکھ 18 ہزار سے زائد عقیدت مندوں نے تبرکات کے زیارت کی اور دعائیں کیں۔ یہ تقریب اس یونین ٹیریٹری میں ہونے والے سب سے بڑے روحانی اجتماعات میں سے ایک تھی۔
ذرائع کے مطابق، الوداعی تقریب میں لیفٹیننٹ گورنر لداخ، ونئے کمار سکسینہ، اور مختلف شعبہ ہائے زندگی سے تعلق رکھنے والے افراد نے شرکت کی۔ لیفٹیننٹ گورنر نے سوشل میڈیا پلیٹ فارم ‘ایکس’ پر بتایا کہ تبرکات کی روانگی سے قبل لیہ ایئرپورٹ پر ایک باقاعدہ گارڈ آف آنر پیش کیا گیا۔ انہوں نے اس نمائش کو ایک ایسا دور قرار دیا جس نے لداخ کو عبادات، ہمدردی اور روحانی بیداری کی سرزمین میں بدل دیا۔ علاقے کے گلی کوچوں، دور دراز دیہات اور مصروف بازاروں میں عقیدت اور احترام کی فضا محسوس کی گئی۔
لیفٹیننٹ گورنر سکسینہ نے امید ظاہر کی کہ بدھ مت کے یہ مقدس تعلیمی پیغامات دنیا بھر میں اتحاد، امن، ہمدردی، بھائی چارے اور رواداری کو فروغ دیں گے اور تمام سرحدوں اور اختلافات سے ماورا ہوں گے۔ انہوں نے اس تاریخی نمائش کی کامیابی میں حصہ لینے والے تمام افراد کا شکریہ ادا کیا۔
14 روزہ نمائش کا باقاعدہ اختتام بدھ کے روز ہو گیا، جب ہزاروں عقیدت مندوں نے چغلسمسر میں واقع دھرم سینٹر میں آخری رسومات ادا کیں۔ 29 اپریل کو جب یہ مقدس تبرکات لیہ پہنچے تھے تو اس وقت بھی عوام نے انتہائی جوش و خروش کا مظاہرہ کیا تھا۔ ہزاروں کی تعداد میں لوگوں نے لیہ ایئرپورٹ سے جیوتسال تک سڑکوں پر کھڑے ہو کر ان کا استقبال کیا تھا۔
اس نمائش کا باضابطہ افتتاح یکم مئی کو 2569 ویں بدھ پورنیما کے موقع پر وزیر داخلہ امیت شاہ نے لیہ کے جیوتسال میں کیا تھا۔ وزیر داخلہ امیت شاہ اس افتتاحی تقریب کے لیے دو دن لداخ میں مقیم رہے۔ اس موقع پر اروناچل پردیش کے وزیر اعلیٰ پیما کھنڈو، مرکزی وزیر کرن ریجیجو، سری لنکا اور تھائی لینڈ کے سفیروں، پارلیمنٹ کے اراکین، سینئر بدھسٹ رہنماؤں، راہبوں، اسکالرز اور بین الاقوامی زائرین سمیت کئی اہم شخصیات نے شرکت کی۔
حکام کے مطابق، تبرکات کو نو دن تک جیوتسال میں نمائش کے لیے رکھا گیا، جس کے بعد 11 اور 12 مئی کو انہیں زنسکار کے کرشا گونپا منتقل کیا گیا جہاں ان کی نمائش کی گئی۔ نمائش کے دوران خصوصی دعائیہ تقریبات، ثقافتی پروگرام، کانفرنسیں اور روحانی سرگرمیاں منعقد کی گئیں۔ الوداعی تقریب کا موقع لداخ کے سالانہ عظیم دعائیہ تہوار، مونلم چینمو سے بھی جڑا تھا، جو امن اور خوشحالی کے لیے وقف ہے۔
مونلم چینمو تہوار میں ہزاروں راہب، راہبات، معزز رنپوچے اور عقیدت مندوں نے شرکت کی۔ حکام کے مطابق، اس موقع پر راہبوں کی جانب سے ‘چم’ نامی مخصوص ماسک ڈانس بھی پیش کیے گئے۔