رام بن؍؍سینٹرل ریزرو پولیس فورس کی 84ویں بٹالین نے جموں سیکٹر کے تحت رام بن ضلع کے چندرکوٹ علاقے میں مرکزی حکومت کی ”نشہ مکت بھارت ابھیان” مہم کے تحت ایک بھرپور بیداری ریلی کا اہتمام کیا، جس میں مقامی طلبہ، اساتذہ، رضاکاروں اور ہم درد این جی او کے نمائندگان سمیت دو سو سے زائد افراد نے شرکت کی۔
یہ ریلی ٹی جنکشن چندرکوٹ سے روانہ ہو کر جی کمپنی 84 بٹالین سی آر پی ایف کے جے پی گیٹ پر اختتام پذیر ہوئی۔ ریلی کے شرکاء نے ہاتھوں میں بینرز اور پلے کارڈز تھامے منشیات کے خلاف نعرے لگاتے ہوئے عوام میں شعور بیدار کیا۔
تقریب میں کمانڈنٹ این رنبیر سنگھ، سیکنڈ ان کمانڈ وکرم سنگھ، اسسٹنٹ کمانڈنٹ دیپک شکلا، روپیش کمار اور شری رام مینا سمیت بٹالین کے دیگر افسران نے شرکت کی۔
کمانڈنٹ این رنبیر سنگھ نے اپنے خطاب میں کہا کہ سی آر پی ایف کا مشن محض سرحدوں اور داخلی سلامتی کی حفاظت تک محدود نہیں بلکہ معاشرے کو درپیش سماجی خطرات کے خلاف بھی یہ فورس صفِ اول میں کھڑی رہتی ہے۔ انہوں نے زور دے کر کہا کہ منشیات کا زہر نہ صرف فرد کی زندگی برباد کرتا ہے بلکہ پورے خاندان اور معاشرے کو اپنی لپیٹ میں لے لیتا ہے، اس لیے ہر شہری کو ”نشہ کو نہ، زندگی کو ہاں” کے عزم کو اپنانا ہوگا۔
انہوں نے نوجوان نسل سے اپیل کی کہ وہ اس مہم کو محض ایک تقریب تک محدود نہ سمجھیں بلکہ اپنے گھروں، محلوں اور تعلیمی اداروں میں منشیات کے خلاف فعال کردار ادا کریں۔
84ویں بٹالین کے میڈیکل آفیسر ڈاکٹر بیرن مول سنگھ نے منشیات کے جسمانی، ذہنی اور نفسیاتی نقصانات کے بارے میں شرکاء کو تفصیل سے آگاہ کیا اور بچاؤ کے عملی طریقوں پر رہنمائی فراہم کی۔
مقامی اساتذہ، طلبہ اور شہریوں نے سی آر پی ایف کی اس انسان دوست پہل کو خراجِ تحسین پیش کیا اور عہد کیا کہ وہ اپنے علاقے کو منشیات سے پاک کرنے کے لیے ہر ممکن کوشش جاری رکھیں گے۔