جموں؍؍نوراتری کی آمد سے قبل جموں کی فضاؤں میں روحانیت کا رنگ گہرا ہو گیا جب بی جے پی ہیڈکوارٹر تریکوٹہ نگر میں ایک پروقار تقریب کے دوران ”ماں باوے والی نال نال” کے عنوان سے ایک نئے بھجن البم کا باضابطہ اجرا کیا گیا۔ یہ البم جموں و کشمیر بی جے پی کے میڈیا انچارج ڈاکٹر پردیپ مہوترا نے جاری کیا۔
یہ روحانی تقریب بی جے پی سنسکرتی، آرٹ اینڈ کلچر سیل کے کو-کنوینر ساحیل مہاجن کے زیر اہتمام منعقد کی گئی، جس میں سنجے بخشی، ستیش شاستری اور دیگر پارٹی رہنماؤں نے شرکت کی اور تقریب کو یادگار بنایا۔
یہ بھجن ممتاز گلوکار ندا سلیم کی سریلی اور روح پرور آواز میں ریکارڈ کیا گیا ہے۔ گیت کے جذبات سے بھرپور بول معروف شاعر راجو ہری پوریہ کے قلم سے نکلے ہیں، موسیقی بلیک لائف اسٹوڈیوز نے مرتب کی ہے جبکہ ویڈیو کی پرکشش ہدایت کاری کے کے ملہوترا نے کی ہے۔ بھجن کی دھن اور کلام نے تقریب میں موجود حاضرین کو گہری روحانی کیفیت میں ڈبو دیا۔
ڈاکٹر پردیپ مہوترا نے اس موقع پر اظہارِ خیال کرتے ہوئے کہا کہ ماں باوے والی جموں کے عوام کے دلوں کی دھڑکن ہیں اور صدیوں سے اس خطے کی روحانی محافظ کے طور پر پوجی جاتی ہیں۔ انہوں نے کہا کہ یہ بھجن محض ایک فنی تخلیق نہیں بلکہ عقیدت مندوں کی طرف سے ماں کی بارگاہ میں پیش کیا گیا خالص روحانی نذرانہ ہے۔ نوراتری سے عین قبل اس بھجن کا اجرا اسے مزید معنویت اور تقدس عطا کرتا ہے۔
انہوں نے جموں کے باشندوں سے پرزور اپیل کی کہ وہ اپنے مقامی فنکاروں کی پذیرائی کریں اور ایسی ثقافتی و روحانی سرگرمیوں کو فروغ دیں تاکہ جموں کی قدیم فنی اور روحانی وراثت نہ صرف زندہ رہے بلکہ عالمی سطح پر بھی پہچانی جائے۔
ساحیل مہاجن نے کہا کہ بی جے پی سنسکرتی سیل علاقائی ثقافت، موسیقی اور فنونِ لطیفہ کے فروغ کے لیے ہمہ وقت سرگرم عمل ہے اور آئندہ بھی نئے اور باصلاحیت فنکاروں کو اپنی صلاحیتیں منوانے کے مواقع فراہم کیے جاتے رہیں گے۔
گلوکار ندا سلیم نے اپنے اساتذہ اور بی جے پی قیادت کا تہہ دل سے شکریہ ادا کیا اور تقریب کے اختتام پر بھجن کی چند سریلی لائنیں پیش کر کے حاضرین کو روحانی مسرت سے سرشار کر دیا۔