ریاض؍؍سعودی عرب کی سپریم کورٹ نے باضابطہ طور پر اعلان کیا ہے کہ رواں سال عید الفطر 1447ھ بروز جمعہ 20 مارچ 2026ء کو ادا کی جائے گی۔ یہ اعلان اس وقت سامنے آیا جب بدھ 18 مارچ کی شام سعودی عرب کے کسی بھی حصے میں ماہِ شوال کا ہلال دیکھنے کی تصدیق نہ ہو سکی، جس کے نتیجے میں ماہِ رمضان المبارک 30 دن کا قرار پایا اور مسلمانوں نے جمعرات 19 مارچ کو بھی روزہ رکھا۔
سعودی سپریم کورٹ نے 18 مارچ کی شام ملک کے تمام علاقوں میں چاند دیکھنے کی سرکاری اپیل جاری کی تھی اور اس غرض سے ملک بھر میں رصدگاہیں اور چاند بینی کی کمیٹیاں متحرک کی گئی تھیں۔ تاہم بعض علاقوں میں ابر آلود فضا اور موسمی حالات کے باعث ہلال کی رویت ممکن نہ ہو سکی۔ تمام مراکز سے موصول ہونے والی رپورٹس کا جائزہ لینے کے بعد سپریم کورٹ نے قمری حسابات اور شرعی ضوابط کی روشنی میں عید الفطر کی تاریخ کا باضابطہ اعلان کیا۔
سعودی عرب کے اعلان کے بعد متحدہ عرب امارات، کویت، قطر، بحرین، عراق، یمن، فلسطین اور لبنان سمیت خلیج اور عالمِ عرب کے بیشتر ممالک نے بھی جمعہ 20 مارچ کو عید الفطر منانے کا سرکاری اعلان کر دیا۔ ترکی اور آسٹریلیا سمیت کئی دیگر ممالک نے بھی اسی تاریخ کی تصدیق کی ہے۔
عید الفطر اسلامی کیلنڈر کے دسویں مہینے شوال کی پہلی تاریخ کو منائی جاتی ہے اور اس کا تعین شوال کے ہلال کی رویت سے مشروط ہوتا ہے۔ ماہِ رمضان المبارک جو روزوں، قیام اللیل، تلاوتِ قرآنِ حکیم اور روحانی تزکیے کا مہینہ ہے، اس کی تکمیل پر عید الفطر اللہ تعالیٰ کی بارگاہ میں شکرانے کا دن ہوتا ہے۔
عید کے مبارک دن مسلمان صبح سویرے غسل کر کے نئے لباس زیب تن کرتے ہیں، صدقہ فطر ادا کرتے ہیں اور پھر عیدگاہوں اور مساجد میں عید کی نماز ادا کرتے ہیں۔ آپس میں گلے ملتے، مبارکبادیں دیتے اور غریبوں و محتاجوں کو بھی خوشیوں میں شریک کرتے ہیں۔ سعودی عرب کی وزارتِ انسانی وسائل نے نجی شعبے کے ملازمین کے لیے عید کی تعطیلات کا اعلان پہلے ہی کر دیا تھا۔
برصغیر پاک و ہند کے حوالے سے بھارت میں عید الفطر 21 مارچ بروز ہفتہ کو منائے جانے کا امکان ہے کیونکہ یہاں چاند کی رویت عموماً خلیجی ممالک سے ایک دن بعد ہوتی ہے۔ تاہم حتمی فیصلہ مقامی رویتِ ہلال کمیٹیوں کے اعلان پر منحصر ہوگا جو نمازِ مغرب کے بعد جاری کیا جائے گا۔