لکھنو یونیورسٹی کے اسسٹنٹ پروفیسر کا فحش کالز اور پرچہ لیک کرنے کی پیشکش کے الزام میں گرفتار

لکھنو: لکھنو یونیورسٹی کے شعبہ زولوجی کے اسسٹنٹ پروفیسر، پرمجیت سنگھ کو ایک طالبہ کو فحش فون کالز کرنے اور امتحانی پرچہ لیک کرنے کی پیشکش کے سنگین الزامات کے تحت حراست میں لے لیا گیا ہے۔ سوشل میڈیا پر گردش کرنے والی آڈیو کلپس نے اس معاملے کو منظر عام پر لایا، جس کے بعد یونیورسٹی انتظامیہ اور پولیس حرکت میں آ گئیں۔

اطلاعات کے مطابق، مذکورہ پروفیسر نے مبینہ طور پر بی ایس سی فائنل ایئر کی ایک طالبہ کو 14 اور 15 مئی کی راتوں کو قابل اعتراض فون کالز کیں اور امتحان سے قبل ان سے ملنے کا دباؤ ڈالا۔ وائرل ہونے والی آڈیو ریکارڈنگز میں پروفیسر سنگھ کو یہ کہتے ہوئے سنا جا سکتا ہے کہ "ڈارلنگ، تمہارا پرچہ لیک ہو گیا ہے۔ امتحان سے پہلے گھر سے آ جاؤ، ہم تمہیں یہاں پرچہ دے دیں گے۔” اس طالبہ نے اپنی پریشانی سے یونیورسٹی انتظامیہ کو آگاہ کر دیا تھا۔

آڈیو کلپس کے سامنے آنے کے فوراً بعد، لکھنو یونیورسٹی نے اندرونی تحقیقات کا آغاز کر دیا اور حسنگنج تھانے میں باقاعدہ شکایت درج کرائی۔ یونیورسٹی انتظامیہ نے واضح کیا ہے کہ وہ ادارے کی وقار اور تعلیمی ماحول کو متاثر کرنے والے کسی بھی عمل کے خلاف "زیرو ٹالرنس” کی پالیسی پر عمل پیرا ہے۔ یونیورسٹی کی اندرونی شکایات کمیٹی (ICC) نے دونوں فریقین کے پیش کردہ حقائق کو مدنظر رکھتے ہوئے اپنی تحقیقات مکمل کر لی ہے اور اس رپورٹ کو ایگزیکٹو کونسل کے ایک ہنگامی اجلاس میں پیش کیا جانا ہے۔

یونیورسٹی کے کنٹرولر آف ایگزامینیشنز نے پولیس میں ایک فرسٹ انفارمیشن رپورٹ (FIR) درج کرائی ہے، جس میں اسسٹنٹ پروفیسر اور طالبہ کے درمیان مبینہ گفتگو کی تین آڈیو ریکارڈنگز کو شامل کیا گیا ہے۔ شکایت میں امتحانی رازداری کی سنگین خلاف ورزی اور طالبہ کی عزت و وقار کو مجروح کرنے کے معاملے کو اجاگر کیا گیا ہے۔ ایف آئی آر اتر پردیش پبلک ایگزامینیشن (پرونشن آف ان فیئر مینز) آرڈیننس، 2024 اور بھارتی نیا سنہتا کے متعلقہ دفعات کے تحت درج کی گئی ہے۔

واضح رہے کہ جون 2022 سے اسسٹنٹ پروفیسر کے فرائض انجام دینے والے پرمجیت سنگھ نے ان تمام الزامات کی تردید کی ہے۔ ان کا دعویٰ ہے کہ انہیں یونیورسٹی اور طلباء کے درمیان اندرونی سیاست کا شکار بنایا گیا ہے اور انہیں جھوٹے مقدمے میں پھنسایا گیا ہے۔ گرفتاری سے قبل بھی انہوں نے ان الزامات کو مسترد کر دیا تھا اور کہا تھا کہ انہیں نشانہ بنایا جا رہا ہے۔

اس معاملے پر طلباء تنظیمیں بھی میدان میں آ گئی ہیں۔ اکھل بھارتیہ ودیارتھی پریشد (ABVP) نے کیمپس میں مظاہرے کیے ہیں اور یونیورسٹی سے مطالبہ کیا ہے کہ ملزم پروفیسر کو فوری طور پر برطرف کیا جائے اور گرفتار کیا جائے۔ ABVP نے امتحانی سالمیت اور جنسی ہراسانی سے متعلق قوانین کے تحت سخت کارروائی کا مطالبہ کیا ہے۔